كيف تحببين طفلك في المذاكرة !

 كيف تحببين طفلك في المذاكرة !

 إزاى تخلى ابنك يحب المذاكرة ( فى عشر خطوات )

الطفل والمذاكرة

أولا :- المذاكرة مش كل حاجة

ما تخليش كل همك إن ابنك يذاكر دروسه .. لا طبعا .. الحياة مليانة بحاجات كتير ابنك ممكن يعملها من ضمنها اللعب اللى هو أهم حاجة فى حياته

ثانيا :- خلى وقت المذاكرة مرح 

يعنى العبى معاه وقت المذاكرة بوضوح أكتر لما تيجى تساعديه فى المذاكرة اشرحى الدرس بأغنية أو بلعبة واتنططى معاه

ثالثا :- خلى وقت للراحة

لما تحسى إنه مل بالرغم من كل التنطيط أو اللعب وانتى بتذاكرى معاه ابعديه عن المذاكرة لفترة محددة ولازم تتفقى معاه على وقت محدد للراحة مثلا ربع ساعة وتظبطى المنبه على كده وتفهميه بمجرد ما المنبه يرن تقوم ترجع تذاكر تانى ولما يرن ضرورى ترجعيه للمذاكرة علشان يبقى منضبط ، وإذا ما رضيش يبقى يتعاقب بحرمانه من الحاجة اللى كان بيعملها وقت الراحة

رابعا :- مكافأة يومية

لازم تكافئيه على مذاكرته علشان يحب وقت المذاكرة لانه عارف انه ماما هتديله مكافأة بعد المذاكرة ، المكافأة دى انتى تحدديها ، مش بالضرورى تكون حاجة مادية ممكن تكون معنوية مثلا يلعب اللعبة اللى بيحبها وضرورى نا يلعبش اللعبة دى إلا إذا خلص مذاكرة

خامسا :- مكافأة اسبوعية 

تقوليله لو انت ذاكرت كويس طول الاسبوع هنروح النادى مثلا او عند تيتة

سادسا :- مكافأة شهرية 

لو انت نجحت فى الامتحان وجبت درجات حلوة لك مكافأة عندى وانتى برضه تحدديها على حسب مقدرتك ومش بالضرورة تكون غالية ، علميه إنه يرضى ويفرح بأى شىء لأن قيمة الهدية مش فى تمنها إنما فى تقدير الناس ليك

سابعا :- المذاكرة مش مقياس للحب

اوعى تخلى حبك لابنك مرتبط بالمذاكرة ، يعنى تفرخى وتحبيه لأنه ذاكر ، وتطلعى عينه لما ما يذاكرش .. دا أكبر غلط هيخلى ابنك يكره المذاكرة لأنها سبب فى انك بتعامليه وحش

ثامنا :- اتحكمى فى انفعالاتك

يعنى لما يعاند و ما يرضاش يذاكر ما يكونش ردك عنيف لازم تتحكمى فى انفعالاتك ، الطريقة الوحيدة اللى تخليكى تتحكمى فى انفعالاتك وهى مجربة بالفعل هو انك قبل ما تحكمى على ابنك اى حكم دايما افتكرى

(إنه طفل)

(و إنه مش ند ليكى )

ساعتها بس حتخافى ما تعملى أى حاجة فى حقه لأن الطفل ضعيف لا حول له ولا قوة

تاسعا :- الدعاء 

بجد سلاحك القوى الفعال هو التضرع لله كل ما تتعبى من ابنك وتجهدى اشتكى له وكلميه وقوليله يارب انا تعبت ومش عارفة اعمل ايه ، وصدقينى هتلاقى سيل من الهبات الربانية

أخيرا :-

اعتقد إن نجاح الأم فى تنفيذ النصائح مترتب على قوة صبرها ثم قوة صبرها ثم قوة صبرها .. 

وبعدين يجى دور العزيمة والارادة .. 

وبعدين تصحيح الأخطاء باستمرار لأن مش ممكن جميع التجارب بتنجح من أول مرة

 إعداد / Ala'a Shbeeb